قصتي قصه..لو اكتبها تضيق=منّها الكلمات وانفاس الحروف
او يشّب من القهر ثلجي حريق=او تطيح من السما بنتٍ عطوف
كنت احسب الصدق له لون وبريق=مادريت الكذب له عدّة صنوف
كنت احسب الورد للنحله رحيق=كيف صار الورد زينه للرفوف؟
كنت اشوف اللي..يفضفضلي صديق=جيت افضفض مالقيت اللي يشوف
لوزماني دآخل اعمآقي يويق=شاف حلمٍ مات وجروحٍ ضيوف
وان سمعني حس في صوتي شهيق=وان قراني شاف آمآلٍ وقوف
يازمن..صعبه على حرٍ طليق=لا حلم بالحلم مربوط الكفوف
والله ان لو دنيتي لحملي تطيق=كان انآم ولا تصحيني حسوف
دآمني خسران لي حلم وعشيق=وش بقالي ينحسب ربح وقطوف؟
وش بقالي وآه يا طول الطريق=لجل اوفّي ما حلفته من حلوف
يابحر جيتك.. ابشكيلك وآفيق=يمكن القى في صدى موجك عزوف
حلمي اللي مات قدّامي شنيق=كنت ابسعف بس.. مربوط الكفوف