زرت الديار اللي بها الناس الامــوات = وجيت اللحود وشفت قبر الحبيبـه
جلست يمّ القبر والدمع زافــــــــــات = وجروح قلبي مدمياتٍ عطيبــــه
والعمر قفّا ما بقى فيه ساعـــــــــات = لحظة وداع الشوق عندي مصيبه
اصفّق على الكفين مخنوق عبـــرات = على الذي ما عاد شيٍّ يجيبـــــه
اللّي غلاه بداخل الروح والـــــــــذات =اللّي عليه القلب زايد نحيبـــــــــه
وبديت انا أسأل قبرها بالســـــؤآلات = يا قبر ليه الشوق يترك حبيبــــــه ؟؟
يا قبر وين الشوق لا تقول لي مــــات= ولا لا تقول انه غدابه نصيبـــــــه ؟؟
ولا لا تقول الوقت عن شوفته فــــــات = عسى بتالي العمر عندي تجيبــه ؟؟
ودّي بشوفه لو ثواني ولحظــــــــات= ودّي اسولف له حياةٍ صعيبـــه
بيني وبينه في سوالف كثـــــــــــيرات = ومن بيننا يا قبر حبٍّ عذيبـــه
عمرٍ جرى لي بعدهم فيه ويــــــلات =ذقت العذاب وذلته والغصيبـــــه
ردّت عليّ احجار قبره اجابـــــــــــــات= قالن حبيبك راح لا ترتجي بــه
وش ترتجي ميت ومن ضمن الاموات =اطلب له الرحمه وجنه وطيبـــه
اللّي خذاه الموت ما يعود هيهـــــــات=لا والذي عالم بسرّه وغيبـــــــه
واستغفر الرحمن في كلّ الاوقـــــــات = عسى بدار الخلد تلقى الحبيبـــه