وجـدي على قـلبٍ من الهـم خالي = لـه راعـيٍ لامـن بـغى الـنـوم يـاتـيــه
مـاعـذّبـن يــاكــود طــول الـيالـي = هو ينـشرى نـوم الخلايق وأنا اشـريــه
حلـو المنــام بعينـي اليــوم غالــي = مدري جـفـاه النـوم أو هي تـجافـيـــه
كـم واحـدٍ عـن لـذة الـنـوم سـالـي = كـم واحـدٍ لـيـلـه خــويٍ يــخـاويــه
يـشـيل جـرحٍ ماحَـدٍ مَـعْـه شــالي = نـاره مـابـيـن ضـلـوع صــدرٍ يــواريـه
ثـقـل الـجبال الراسـيات العـوالـي = جــرحٍ عـمـيـقٍ عـزّ مـن هـو يــداويـه
مقـعـده مابـين الـمـعالـيـق طــالي = كـل ماهـقـاه انـزاح خـابـت هـقـاويـه
احـدٍ يـحبـس دمـوع عـينٍ غـوالي = وإن بان دمـعـه قـام بالكـف يخـفـيـه
واحــدٍ يـهل الـسـايلـه مـايـبالـي = يوجـس لهـيب الجرح دمـعه يطَـفّـيـه
همي من السيف الثقـيل الـمـشالي= اللـي عِــداة الــديـن تــذكـر لــيالـيـه
يامـا فـتـحنا فـيه عَـسـر القـفـالي = ومن لا لفـانا طِــيْب بالسـيف نلـفـيـه
فـي كَــف حِــرٍّ مايـصـرّ الـرِيالـي= ولادَهَــن بـكـريـم (نِــفــيــا) أيـاديـه
ولاجـمع شِـرطان (هِـنـد) (ونوالي)= ولا نسى المصحف على الـرَّف راميــه
ولاتـعـصَّـب (للنَّـصر) و (الهِـلالي) = ولاعِـن الـمسـجد يـنَـحّـي خَـطـاويـه
ولاحَـلَـق لـحـيـتـه غِـنْـج ودلالـي = ولا خَــذا {مــرةٍ} لاأذن تــغــطـيـه
شَـالـه رجالٍ يـنـطـحون الـمـحالي = في كَـف زيـزومٍ خَطا الـموت تَـتـليـه
عـدوهـم بالـحـرب مَـالـه مـجـالي = يـشـيـب شَـعّـرٍ نابـتٍ فـي عـلابـيـه
لاشاف عَـجّ الجيش خلف الجبالي = والـسـيف وسـط الـعَـج بـرقٍ مـواضـيـه
ضـاقـت به الدنـيا يـمـين وشـمالي = وأيـقـن مـن الـدنـيا تَـرخَّـت عَـراويـه
مـن داس أراضـيـهـم دَنــا للـزوالي = يَفـنـى ويـقـبر فـي دَنَـاسـة مـواطـيـه
كم جاهـدوا به لجل عـين الـمعالي = جـنَّات عـدنٍ وسـطها الحـورِ في تِـيــه
أهـل السـيوف اللي تـِدق الـعـوالي = كم راس نـذلٍ بأحـمر الـدم تـكـسـيـه
لاصافـحتها الشـمس بـيـضٍ تـلالي = تـجّهـر عـيون اللي نـظـرها وتـعـمـيـه
أسـأل ولـيت الـكل يـفـهـم سـؤالي = السيف ويـن؟ ويـن صــولات اهـاليــه
جاوب وخّل الصـوت ياخوك عـالي = السيف ياأهل السيف ضاعـت لـياليـه
يـمكـن تـحــرّك خـامــدٍ مـايـبـالي= ويسـمـعـك مـن سَـدّ بـيـديـنه آذانـيـه
يكـفي بـكى على السـنين الخـوالي = ومجـدٍ مـضى بالـدمـع ماراح نـبـنـيـه
الـمجـد يـرجـع بإتـحـاد ونـضـالي = مـاهـو بـصـفٍ بان شـرّ الـخـلل فـيـه
وإعـداد قــــوه لـجل ســود اللـيالي= تـرهـِب عـدو اللْه ومـن هـو يـخـاويـه
إلـى مـتى والـعـزم رخـو الـحـبالي = وإلـى مـتـى والصـبر تـزحف لـيالـيــه
ضـاعـت ديار تـرابـهـا حـيل غـالي = وعـدونـا مـن ضـعـفـنـا صـار راعــيــه
داسـوا فـلسطـين وهم اليــــوم تـالي = (بـعـراقـنـا) والـلْـه عـلـيــمٍ بـتـالـيــه
أقـولـهـا والـحــق غـايــة مــقـالـي = ومـافـيـه حـيٍ سـاعـة الـحـق أداريــه
إن عجْزت عن السيف كف الرجالي = خـلّو الـكـفـوف اللـي تـحـنّـا تـعـلّـيـه