ياوقت ماملّيت تطعَن بمِلتاع=ملّ الطعون ولابقى به مناعه
الى متى وانا احفِن تربه القاع=وأمنّي النفس بحصاد الزراعه
أوفي لغيري بآع ويخونني بآع=بآعي وفاي وعظ الايدين بآعه
بي ونّهٍ حبستها بين الاضلاع=لو ذِعتها شيّب طُفيل الرضاعه
ياوقت ودي بك تجي يوم فزّاع=مرّت ثلاث عقود ماشفت ساعه
اضحك والملم داخلي حُزمه أوجاع=ومالي على حبس الدموع استطاعه
أكنّها في ساع واهدّها ساع=مادام تغسل قلبي عن القطاعه
ولا انت يامطنوخ وعيونك وساع=مثل الظبي في جفلته وارتياعه
شيّدت لك مركب غلا بين الاضلاع=عشره مجاديفه وعشره شراعه
ياعود نرجس مع بختري ونعناع=لاشفت خصرك قلت هذي مجاعه
يالريم وانتي عارفه كل الاوضاع=الغربه وحظي وهمّي جماعه
ماني بخوانك ولاني بخداع=والغدر ماله وسط سوقي بضاعه
وشلون ابفرح والحزن فيني انواع=مخفي براكين الالم في براعه
ضاعت فلسطين ومعاها الفخر ضاع=ونكّست عقل العرب في ضياعه
واحد لها خاين وواحد لها باع=ع الطاوله ثوري ومن تحت باعه
وسيف الغدر لأمجاد بغداد قطّاع=سلب ودمار وقطع روس وبشاعه
وأطفال بالصومال مرضى وجُيّاع=وحنّا صيانينا تزايد وساعه
نطرب على شيرين ونطق الاصباع=وأجيالنا كَدَش وجينز وصياعه
حتى كتاب الله شكى الهجر والدّاع=ماغير يتكدّس بدور الطباعه
آمالنا زخّه مطر بصبخه قاع=على مهبّ الربح مبحر شراعه
ياوقت من طعناتك جروحي وساع=ملّيت طعن ولابقابي مناعه