هات القلم وأكتب من الشعر مالاق= وأشرح وعبّر مايكنه ضميري
من هاجسٍ بي ضاق ومن رافقه ضاق= شانه أخلاقي ومنه شل أتعبيري
والقلب من بين المعاليق صفّاق= يصفق أضلوع حاجراته حجيري
يكفخ كما طير للأفاق شقّاق= تل السبوق وقط حبل الجريري
لياصفق راسه من الحوم وأشتاق= شق الفضاء شقة شعاع الأثيري
لاق الفضاء له لاق والحوم له لاق=يلعب كما لعب الهوى بالغديري
يادق به من جاير الوقت دقّاق= يطوي فجوجه طي سلك الحريري
نيران قلبي تحرق الخافق إحراق= منه أشتكيت ولا شكا منه غيري
أحب شوف البدوا وللبدوا مشتاق= ودارٍ هواها مثل ريح العبيري
مع لابةٍ حبي لهم فاق الأشواق= كبار الرباع مدلهين القصيري
أخير من رفقتك ياطاق طرباق= فرقاك عيد يا سعادة مديري
يالله طلبتك عنه تكتب لنا أفراق= وغيب الزّمن مجهول هو والمصيري
الوقت يجري بك والأيام مرّاق= مهما ارتفعت تنزّلك بتحديري
دنيا بها تاق ومرٍ وترياق= لوهي صفت لك تطعنك بالشّطيري
ومهما وصلت العالم العلم وأفاق= نهايتك تبرك بروك البعيري
يطونّك الأيام بأمكار وأحلاق= طي الرشا ودنياك غيبه خطيري
لو الزّمن لك راق يصير عقّاق= كلاً مسافر والليالي تسيري
والنّاس بالدنياء توافيق وأوفاق= وحكم القدر على الغني والفقيري
لو كل طيرٍ طار للصيد لحّاق= كلاً بجناحينه يرف أويطيري
طير الحباري لأبرق الريش شلّاق= مثل الأرهابي يابطش بالأسيري
وركض البغل مايجاري الحصن بأسباق= وأنت الحكم بخيولها وال****ي
وطعم الحوامض يعرفه من لها ذاق= وعمى النظر مايشوف مثل البصيري
وختمت مابرمج لساني بالأوراق= هذا ملخص خبرتي وتحريري