العين تكفي عن الأقوال لو قيله = وأثار سيل المطر يبين من وشمه
غيمه وبرقه تجاذبنا هماليله= سحايبه في ملم القوع من هشمه
وراع الوفاء والشرف ماعاش بالحيله= ولاهو بعير يخم الشيح والهشمه
صديقك اللي يعزّك يوم تشكي له = لا تبدله بالردي لوهو كبر رشمه
رجلاً يشوف السّنع والقول يصغي له = مايعرف الحق والمعروف ما يغشمه
والناس بالناس ياقلّة محاصيله = لا تأخذ النّاس بميانه ولا تعشمه
وأحشم خويك عن الزلاّت والعيله =لو شفت منه الخطاء يلزمك وتحشمه
ما حشمته عندنا يومٍ ولا ليله = يزود قدره مع الأيام ونحشمه
ولا كل رجلاً تقدى به وتقني له = ولا كل سيف يقص العظم ويهشمه
وأن حدك الوقت والأيام به ميله = وزادت عليك الرجال وقلّة الحشمه
ضدوك قهراً ولا قوت ولا حيله = عليك جار الزّمن والناس من طشمه
حدوك رجالٍ تعرف الحق وتميله = ناس عن الشرع والقانون من غشمه
أزبن على اللي يزيح الظيم ويشيله = تأخذ لك الحق غصباً من ورى خشمه
لهم مع الحق منهاج وتحويله = لا تقبل الذل والأنذال لاتحشمه
العفن مايطيبه ماله ولا كيله = والذّل موت يذل الرّجل ما يحشمه
حيٍ يهينك وتشكي له وتلجي له = أنا أشهد أنك غشيم ياملا البشمه
هذا ملخّص حياتي وشرح تفصيله= تصفّحه وأفهمه وعدّه لا أبو حشمه
ياشوق من خدها يوضي ورى الشيله= بنت عن العيب والمنقود محتشمه
يضفي على جسمها ستره ومنديله = بنت الذي يزعل العدوان ياغشمه
أن جاز لك قيمته تقرا مواويله = وإلاّ بدرام القمامة يحط وتهشمه