الله من عينٍ مثل عين عربيد= يفوح ناظرها كما حقل واره
أسترسلة للدمع من تحديد=جرّح ماجر ناظره بنحداره
من خافق قامت تشده شواديد=الضغط به زايد وزود حراره
لوما يحكمنّه ضلوعٍ حواديد= يفر مثل اللي سريعٍ طياره
توه قضيب وطار من كف صنديد=ومن الحماقة والزّعل به نزاره
متوحش وقدد لك السبق تقديد=تل السبوق وفر تالي نهاره
طقه حيام شرق حزم الجلاميد= هام الفجوج اللي بعيدٍ دياره
حط المحص وإسهال ندفا تسانيد=وما طال من سهلة بسيطا يساره
نطح هوى الغربي وضرب خالي الريد= وغاب الشفق والليل زوّد ذعاره
من اللي صدفنا عند قسم المواعيد= عين العنود أن ذيرة وأستذاره
كنه غزال جافل مع جراهيد= أو مهرتٍ مع أول الخيل غاره
وناديت له ياريم ياقايد الصيد= وقالت نعم لكن تر الأسم ساره
وسألت أنا وش جاب ريمٍ وتغريد= قالت نزور وطاف وقت الزياره
راحن وأنا ماخذت علومٍ تواكيد= وبقيت أنا حاير والأقدام حاره
وقلبي كما زرع ليالي جويريد=يبس سريه والعطش هو دماره
ونخيت سمحين الوجيه الأواليد= أن طار عن روس العذارى ستاره
بالماقف اللي به خطوره وتهديد= أن ضيعت شقح العشاير حواره
وشلون نعكس مسلك النظم والسيد= ونجتاز رجل الأمن وقطع الإشاره
وثنوا هل النّخوة عيالٍ صناديد = اللي نهار الكون تروي شطاره
لكن صحيت ولا بعد شفت تغريد= إلاّ كوابيس الحلام وهذاره
لا ريم أنا شفته ولا زرت بالعيد= إلاّحلوم الليل وهمش قراره
كذب علينا إبليس بالمكر والكيد= حتى لو أنك نيم يوثق شعاره
أحلوم ليل والمصادر هرابيد= ماجيت أنا تغريد ولا شفت جاره
وبالوارده ما سدد السجل بالقيد= وإبليس مارس كذبته في جداره
يهجم بجيش وآمرينه حواسيد= بالحسد هو والمكر يرفع قداره
يبي يضمك ضمن ناسٍ كواديد= لو كنت ما تفهم عروض التجاره
وصبحت في سوق المتاهات يازيد= ولامن بضاعة والتجارات باره
والخاتمة وصلت نهاية الميد = وشمس العصر غابة وعتّم حـمـاره
رجلٍ كبير وكن رجلي بهاء قيد= ماني خوي ريم ولاني بداره