يحق لك تدعين حورية الحور=ويحق له تزهر ليا سرتي القاع
ويحق لك يطفى ليا جيتي النور=لو ما يطفىً كان من شرقتك ماع
جيدك فنار وقذلتك ظلمة ابحور=وخدك نهار وبسمتك ضيق مرباع
بوكيه ورد مغلفينك ببلور=جوري منقىً منظره قمة ابداع
فزتي بتاج الزين تصويت جمهور=كل الخليقه صوتوا لك با الاجماع
غريبه انك بنتٍ لتسعة اشهور=وانتي فريدة.. شكل.. واوصاف.. وانواع
في لفتتك ريمٍ مذيًر ومذعور=يفزْ من ظلُه مجفًل ومرتاع
وفي نظرتك حرٍ شلع شقة النور=تلبد عنه طير الحبارى ليا فاع
ياعزوتي كل الحلى فيك منثور=الملح ..والقبله.. وزينات الاطباع
من مات باسبابك من الخلق معذور=ومن راف به طرفك لاوآمرك ينصاع
ومن شاهدك ياقف على الدرب مسمور=ما يحترك مشدود للهم جرًاع
زايغ بصر من قابله قال ما جور=على شبابه قبل ما يبتدي ضاع
ما يبرم الكلمه معلًق ومقهور=ما فادته نخْوه ولا صوت فزاع
يا طربتي وش بك عليْ جايره جور=ماترحمين اللي من الوجد ملتاع