أحمس لنا يا شوق من زاد نوره =من حب خولان اليمن زوده زود
بدلال بيض يغدي الهجس فوره =لا فاح ريح البن بالهيل والعود
يغدي هواجيس سريعاً حضوره =وجور الزمن حكمه يقود البشر قود
ما ينعدل شيله وميله وجوره =مصاعده كود ومنازله كود
يا ما شكا منها عزيز شروره =لو كان عنده من الحرس جيش وجنود
وإلا الزمن يحكم علينا مروره =حكمت مناحيم على حزب ليكود
يفرض على المخلوق حكمه ودوره =والناس له تخضع بلا شرط وقيود
حكمه يسوق الناس من غير شوره =والعمر وقت وكل وقتٍ له أحدود
يسوقهم جور الزمان ودبوره =سوق القطيع اللي على الذبح مردود
على متن جسر صعيب عبوره =أكيد هو مشهود ولقاه مشهود
والموت بالمخلوق محيط سوره =والناس بالأيام طارد ومطرود
دنياك ما هو دايمن لك سروره =يا لله عسانا من هل العفو والجود
وإلا المقابر لازم أنك تزوره =ولا عنه مراغ ولا مزاغ ولا ردود
يا لله تغفر ما حصل من قصوره =وتبدل السيئات بحسنات وسعود
بقدرات من يجري جواري نهوره =ومرسي رواسي طي وجباله السود
والخاتمة ختم خفوقي شعوره =بأزكى صلات عد ما تذري النود
= شعر بهلول حمدان الشمروخي