يابو فهد فزعتك من قبل أولي = وش حيلة اللي له وليف يتغلا
اللي جمع زينن وعقلن ودلي = وفي خافقي فوق الخلايق تعلا
عداد حبه واصلن فوق فللي = وعن ماعداه القلب صد وتخلا
تصدق إني حين أوكبر وأصلي = صورة وليفي قدم عيني تجلا
فواز عفت الروح مما حصللي = لامن طرا بالدمع عيني تملا
فواز عفت النوم لفراق خلي = وأحس غلغلني ثمانين غلا
فواز حالي سله البعد سلي = عزي لعيني كان عني تولى
أقفى ولد الشوف لي في محلي = وهل الدموع وقال بألفين حلا
يابوفهد بالحب مثلي مقلي = ولا إنت خبرة دون درسن وملا
ياصاحبي لاتتركن دون حلي = عجل علي قلبي تقل وسط ملا.

ياللي رقيت النايف المستقلي = محدن لقى في عالي الظلع حلا
وش جاك يازاهي مع الريم قل لي = مثلك على نار الهوى مايخلا
ابشر تراني جيت يالقرم كلي = ولااقول للي يبي الافزاع كلا
افطن وحاسب خطوتك لا تزلي = كم واحد في زلة الساق ولى
واحذر قبال صويحبك لاتذلي = ان شاف جرحك قام فيك يتسلا
قبلك تراني ذقت نيران خلي = وطاح الخفوق برمشها واستشلا
اللي غرامه تل الاظلاع تلي = عين اشقرن فوق الحباري تعلا
وناديت لاجله ليت شمر هلٍ لي = تطلع خفوقٍ في قليبه تدلا
وقاسيت قيظي عقب نسناس ظلي = ولاساح فكري عقبها واسفهلا
اسهر ولااحدن من ربوعي فطن لي = رجلٍ الياشاف المفازيع هلا