ياالله تستر على لساني من الزلّــــه= واستسمحك من خطايا النّفس واهمــــالي
همّي تعدّى الهموم وعلّتي علّـــــــه= ياللي تلوم المشقّـــى مــالك ومــــــــــالي
والله لولا كلام النّاس والذلّـــــــــــه = واخاف من ميـلة الدنيا على عيــــــــالي
لاسمّي الشئ باسمه واكشف الغلـــّه= واغيّر الوضع وافضح خافي هبـــــــالي
واغادر الدّار واهل الدّار والحلّـــــه = وامسح معالم طريقي واقطع ارســـــالي
- لكن مدامي رضيـــت بما قسمـه الله = نويت احطّ الخلا داري ومدهـــــــــــالي
واركب على جيب شاص مكمّلٍ دلّه = نعم الخوي للخلاوي بالخلا الخــــــــالي
تسمع صفيره مع المقناة يا تلّـــــــــه= صفير صاروخ روسي وقت الإرســـالِ
ما يمشي الاّ قطوع ودربه يدلّــــــــه= ويشوش يا جاء عفاش القاع ورمــــــالِ
أرضٍ ماهوكلّ من يبغاه ياصل لـــه= ياما هبا دونــــــــه جميــــحي وجفّـــالي
كان الخوي جاز لي فلّيتها فلّـــــــــه = وان كان ماجازلي تلّيتــــه لحـــــــــــالي
واسجّ بارضٍ قفـــر توّ المطرعلّــــه= وانطّ راس النّـبـا واجـاوب (الصّــــالي)
يالله ياللي تعزّ النـــاس وتذلّــــــــــه= يامبدِل الحـــال من حالٍ إلى حـــــــــــالِ
يالله واناطالبَـــك نٍوّ على حلّـــــــــه= في تالي الليــــل برقه يشعل اشعــــــــالِ
ينشي ويمشي ويسقي ديرتي كلّـــــه= مزنٍ عريضٍ مريضٍ هلّ همّـــــــــــــالِ
سحابةٍ ماتشاف اطرافها.. مضلّـــــه= جزلٍ مطرها اليا اسقت واديٍ ســـــــــالِ
وتربّع اكالشّـعاف اللي عطاها اللــه= ِزين الطّبيــــعه وللاجـــــواد منـــــــزالِ
ومن النّدى تصبح الاشجـارمبتلّـــــه= على الورَق يرتعـش كنّـــه كرستــــــــالِ
ونوّار عشب الفيـــاض مفرّشٍ زلّــه= وصـوت العصافيـــر قام يذكّرالســـــالي
وريح النّفَل والخزامى الجوّ يحتلّـــه= والليــــل قمرا وصــوت الصّيد رحّــــالِ
وراع البعـارين دايــم بـس مع بِلّـــه= زانت بعيـنه عقب مازانهـــا الـــــــــوالي
من جاه عــاني ولو ماهو رفيقٍ لـــه= يلقى صميــــل اللبن والصّخِن بسحـــــالِ
- ياصــاحبي حطّ عفشك والردي خلّه= وش لك بدارٍ تعلّى فيــــــــها الانـــــــذالِ
يابو فهيــد ان تعبنــا بهّر الدلّـــــــه = في فيضة السّـــدِر بين الطـّعس والجــالِ
وليا حصل شاهيٍ مع خبزة الملّـــــه = تسوى- مع العافيه- كبـــــاب واوصــــالِ
نبي نخاوي مطــــانيخ ٍ على المِلـّــــه = اللّي مقانيصـــــــهم دايـــم على بـــــــالي
خويّـــــهم لو يطــول الوقت ما ملّــه = ينسى همومه لو ان همـــــــومه جبـــــالِ
يلقى البسـاط أحمدي، ماللخوي زلّــه= وابعدهَـــــم اللّي نعــــدّه صاحبٍ غــالي
وليااجتمعنــاوكلّ ٍ جـــاب طيــــرٍ لــــه= يطري علينا مثل مقناصنـــــــــا التــالـي
يوم ان(منظــــور) يدلي به ويمهلّـــه= يلعب عليها وهو مِرْهِي وقتّـــــــــــالــي
ان كانهــا حوَّلت للارض ينزل لـــــه= وان كانهـا عزّمت يرقـــــى لها العالــي
تبي تخلّــــص وهو منها مثل ظلّـــــه= وضاقت عليــها وعجـزت عنه تحتالــي
ويوم (البْنِي) وقّــفَن صفّ ٍيراعن لـه= طَقَّـــه ونجّـــــم لاجِلْ من تلبس جلالــي
وسقَط عليهـا، وصِحْنا ـ من يعجّل لـه؟= ويخَلّصَــه حيّــةٍ ، تكفـــون يا عيــالــي
وكـلّ ٍ فزَع والتهــاني جتــــك منهلّـــه= ولجّــوا على الاجهزه هذا اوّل الفــــالِ
و(قيسيّـة) الخــال قدّامي يدبّــــــل لـــه= و(الجيب)الاسـوَد على يمناي يبرا لــي
نِسي الحطب والخروف اللي علىالسلّه= وراح يتجمّــح تقِــل مركــاض خيّــــالِ
- نهارنـــا بالقنَــــــص والليـــل تعللّــــه= ســوالف اجــدادنا والغـــاز وامثـــــالِ
هاذي حـلاة الخلا ، والعُـمُـر قافٍ لــه= يااللي تحســــبونها قصّــــاف الآجـــالِ
ولاعِمُـر قالوا فقيــــرٍ مات من قلّــــــه= ولاقيـــل خلّـِـــد بها من يكنـز المــــالِ
والسّــــاعة اللي تــــروّح ماتجي للّـــــه= مار اغتنِم سـاعتك في خيــر الاعمـالِ