هات القلم واكتب من الشعر بيتين=اكتب من الخاطـر ورتـب مقالي
وجه سلامـي للربـوع العزيزيـن=واحشمه عن قول الخطاء والهزالي
سلم على جمـع الهيافـا ملاييـن=سلـم علـى شيبانهـم والعيالـي
ابن سند والدوح ومفلح مسميـن=شيوخ الهيافا من قديمٍ وتالي
وكـل الهيافا ملحقين المخلين=جميعهـم وافيـن عـز وكمالي
اعلومهم تملاء اصـدور الدواويـن=هـذا الصحيـح ولايبيلـه جدالـي
ربعي هل الطـولات اول وهالحيـن=مزبان من ضاقـت عليـه الليالـي
زبن الجـلاوي لاحـدوه المعاديـن=ماكنه الا .. بين .. عـــمٍ وخـالـي
عز الدخيل اللي شكا لوعة البين=ربعـي مـلاذه مبعديـن المدالـي
ربعي رفيعيـن المكانـه سلاطيـن=يرسون مثل مشمرخـات الجبالـي
زحول الهيافـا بالملاقـا ضريريـن=لاصاحن الخفـرات ويـن الرجالـي
يردون حوض الموت سطوه وصلفين=رجـال باللقـوات مثـل الجمالـي
غوش الهيافا مرجحيـن الموازيـن=ياحظ من حطـوه ضمـن الغوالـي
ننسى العوايـد والقيـم والقوانيـن=لاطوحن بالصـوت سـود الشيالـي
نسكر عيا بالكون نقلـب شياطين=ما يهمنا مـن خصمنـا مانبالـي
نقلب كيان القوم حكمـة وغاوين=فينا سطر فينـا جنـونٍ خيالـي
فينا طناخة روس بالطيب وافين=الضيف نكـرم شاربـه بالجزالـي
وقت الرخاء لاصحابنا دوم رحبين=الاجنبـي كنـه رفيـقٍ مـوالـي
قصيرنا قدره على الـراس والعين=نصيرلـه مثـل القـراح الزلالـي
واختام قولي ياعرب قولـوا اميـن=ياعل اخو عمشـاء بـدار المعالـي
اسس ضبيعه للجماعه دواوين=وتجمعـو فيهـا بزيـن العمالي
وارجو السموحة والعذر يالكريمين=ما كامـل الا وجـه رب الجـلالـي