يا عيد جدك بدل الدار في دار=عنا تنحى .. والمسافه طويله
سافر سفر مهو مثل كل الأسفار=حكم القدر يا عيد ما فيه حيله
جانا الخبر مزعج على وقت الأسحار=علم المصيبه والمصيبه جليله
وقفت منها ضايق الصدر محتار =واوجس بقلبي مثل حر المليله
قالوا هذا اللي صار يا ليت ما صار =صدمه تهد عزوم من يرتكيله
وفاة ريف الربع والضيف والجار=اللي وصوفه بالاوادم قليله
عوض بن مخلف له الطيب تذكار=فقيدنا وفقيد كل القبيله
يضحك حجاجه كل ما جاه خطار=راعي هلا والنفس ما هي ثقيله
عساه ما يعرض .. على واهج النار =في جاه رب البيت منجي دخيله
في قدرة اللي للمخاليق غفار =اللي عبــاده كلها تلتجيـله
وصلاة ربي عد ما بالوطن سار=على النبي إعداد وبل المخيله