ياقلـب ، من بعض البشـر ليش ترتاب=وانت الـذي عندك عن النـاس صوره
وانـت الــذي درســت درسٍ بلا كتـاب=عـن ظـاهـر العـالـم وخـافـي صــدوره
وعايشـت نـاسٍ من قـريبــين واغـراب=وجـربت طيـب النـاس وعـرفـت جــوره
بعض البشر ياقلب يحسب له حساب=الـلــي، ينـومـس عنـد الاجنـاب دوره
اللــي. يحـله يـاحصل حــزم كــللاب=ومـواقـفـه ، عنــد الجمــيـع مخـــبــوره
احــدٍ ، يـؤثـر فـي غيــابه ليـاغـاب=واحـدٍ غيابه خـير لك من حضوره
بعض البشر ، لوكان من ناسٍ اقراب=ودّك ،لـو انـه ، سـاكـنن فـي شـروره
واحـدٍ لو انه من بعيدين الاجناب=ودّك ، يــزورك كـل يـــوم وتـــزوره
وبعض البشر من يوم يدخل مع الباب=يدخل على نفسك هـناهـا وسـروره
ويحسسك ان البشــر كلــه اقــراب=وارواحهــم بطيـب وجمـال معمــوره
وبعض البشـر يبحـث خفيات الاسـباب=مثـل الـذي يحفـر خشـاش الجحـوره