تنهيده الشوق لامن داهمت صدري=وش حيلتي لاغزتني وين اوديها
مالي على الصبر عزم ولا نفع عُذري=غربه وفرقى وطن يالله تعديها
واقرّب الكُم من خدي وانا مدري=عزّه بدو لاتبين بي عباريها
وامثّل ان المزاج من السّعد شَذري=وحَدر الضلوع استر المَلّه واغطيها
واطعَن ثواني حُزن وآشرّبه غدري=وامزح واهيجن بالاشعار وقوافيها
وَشْر التصنّع مُضل وماهو بـ وَشري=والظلم ماكسّر عزومي وامانيها
واطري هبوب الشمال وخافقي يسري=لاهب ريح الشمال وجِبت طاريها
كنّي شعيب وغلا هاك الثرى يجري=في جوفي ويسقى الرّمضى ويحييها
احيا وتحيا معي في غيّي وطُهري=وآسجد واناجي عليمٍ في خوافيها
هذا الوطن ماشِبِع من صُبحي وظُهري=وليا ادلهم المسا لجّت حواريها
طعنات من يدّعي الاسلام في ظَهري=وسكّين من طبّق التُقيه ويدنيها
ثُكلى تنوح الولد ياااامرضعك صدري=وطفله بوسط الرُكام تنوح غاليها
وامّه صُفَت بالخيام وعجّها يذري=وش ذنبها غير صاحت ظُلم واليها
الغرب فوق العرب والفُرس والعِبري=عُمله ولو اختلف بالنقش وجهيها
خنساءنا دَوَّهَت للمعتصم بدري=والمعتصم جمرهٍ فِسدَت تواليها
ولا انت يامُلهمي وحسامي المبري=بي عبرهٍ خانت الصبر بشواطيها
تعال خذني على صدرك ابي جَبري=تلملم جروح غاليك وتواسيها
طبطب على طفلك المكسور في شِعري=واجمع شتاته من الضيقه وهدّيها
بلّور الاحساس لو مكسور من كَسري=ماكان شِعري طُفح من حوض شاكيها
تنهيده الشوق ياثقلك على عُمري=تعبت اخبيك مير الوقت مِبديها