الليل والذكرى والأحزان والخوف=والوقت وجروح الزمان العتيه
والدان والدندان والدبك والأووف=والزيف وحدود الضياع وخويه
ياهوه صدق وأصدق العلم بالشوف=لاتنتظر رد العقول الرديه
يامعزب الرحمن في بيتك ضيوف=لاتقدم الترحيب من غير نيه
اللي عنالك من عنا الوقت مكلوف=حيه على المقدور بأحلى تحيه
أحذر تكون بوجه الأجواد عاصوف=خلك حليم وحكم العاقليه
بيض النوايا والسوالف له وصوف=لايلحقك من بعض حكيك أذيه
أعقل ذلول الهرج عن كل ملقوف=يزعم بنفسه والذمم عامريه
خل التباعد بينكم شي مالوف=ابعد عن اللي مالهم قابليه
تكثر مشاكل والبشر عنده ظروف=ضاعت مبادي روحنا اليعربيه
مريت بالي والمشاعر لك وقوف=ماجبت علم ولا طلبتك حذيه
والوقت والذكرى والأحزان والخوف=والليل وظروف الزمان العتيه