أول ما نبدى نبتدي باسم الله =الواحد اللي لا الاهٍ ... غيره
ربٍ رحيم للعباد مساح= جالي هموم العبد بعد الحيره
نرفع له أيدينا دعا ونلبي =لبيك مع تهليله وتكبيره
ومن بعد ذكر اللاه ننخا شمر= شمر هل التاريخ وأهل الغيره
وأهل الحميّه والفخر والنخوه=سجينكم ينخا يبي تحريره
مع كل شرطي بالسجن يفتح له=يفز قلبه ينتظر تبشيره
يا لابتي بندر سعد ينخاكم =وأنتم هل النخوه كرام السيره
وأبوه ينخاكم وقلبه خافق =غير المرض هم السجين إيديره
وامه تحرى وين فزعت شمر=ودموعها تذرف سبب تاخيره
تأخير مسجونٍ بعد عون الله=يرجي فزع شمر على تحريره
الحمل كايد مير شمر قده =عاداتهم مهما كبر تصغيره
ماهي ديه وحده دياتٍ واجد=مدة ثلاث إسنين جعله خيره
ما تنحصي لاكني أخمنها =أصفارها سته بعد تدويره
مية دفعناها بعامٍ واحد=وسبعين باللي قبلها تقديره
وبالعام هذا فوق نصف الميه=بحساب جاري ما كمل تصديره
اللي ذكرت أرقام مليونيه =والمال شمر تنتهج تبذيره
ايبذرونه ياحصل له واجب=وسط الصحن والا على التبهيره
إيبهرون إدلالهم بالعنبر =والهيل والبن الخضر تحضيره
والكبش يذبح للضيوف مولم=وكلمة هلا يامرحبا بالديره
وعاداتنا في كل دار نهلي =والجارعن ضيم الزمان إنجيره
من دون نقص بكل رجلٍ طيّب=كلٍ على العليا يواصل سيره
لكني افاخر بربعي شمر= صقار و الصقار ينخى طيره
شعري على شمر يزوم لحاله =كنه محدر من شفى تحديره