يوم التقا وادي سنا في جبل طي = صار السنا من واهج النار باين
وتخالط المستقبل الزين بالسي = وحلّت ضعاين وإستقلت ضعاين
وبعد ثمان عصور بالعز والغي = الحر ما يرضى السكن بالطماين
وآخر علاج يدوّر المسلم الكي = والسكري والضغط غير الضغاين
ولو كل من حب يتريح لقى في = ما شفت بظلال الشجر صار لاين
واللي يبي يستذكر الشي بالشي = يشوف ماصاب القمر من تباين
اول قمرخمسة عشريلتهب ضي = واليوم لونه شين والوقت شاين
دار الضوأ للمترف التالي الدّي = وصار التفاخر بالبطن والبطاين
بعد التفاخربالقيم صارت فري = مافيه زهره باقيه بالمداين
وحرثٍ بلّيا بذر ما ينفعه ري = وحلّت بدل شهب الغوارب مكاين
تستنزف المرعى وتستنزف المي = وتعين لكن تمنعك لا تعاين
وعزاي باللي مات ما قاله الحي = لازال للنعمان باقي جناين
لكن جرح السالفه بيننا نِي = وحجز المشاعر كإحتجاز الرهاين
والعي ما يعرف علاجه سوا العي = واللي يعيي يرفع الظلم خاين
ولو خيروني بين لبنان ودبي = إخترت بين المسعري والقراين