هلت دموع عيني عند مدخل مشار= يوم شفت الشعيب مكبلينه بسور
الله اكبر على ذاك الزمن كيف دار=صادق اللي يقول ان الليالي تدور
وين وقتٍ مضى حزآت كنا صغار=كيف مرتع صبانا يدٍعي با الثبور
دوك دقات قلبي كنًها صوت طار=تآه فكري واظنٍي يوم صحت مْعذور
(الصفاة) حفدوها كونوا له جدار=واتلفوا حصو(ثرمد)واستهانوا (بزور)
يا (خضع) وش بلا وجهك كساه الغبار=وين شلالك اللي يطرب اللي يزور!
وين رحلاتنا لك قبل وجه النهار=جاهمينن قبل ينشق للصبح نور
خوفنا يحجزونك واهل حايل كثار=صبح جمعه تجيك الناس قبل الفطور
وين ذيك الدلال اللي بوسط الوجار=والاباريق نبعدها لجل ما تفور
وين الارطى ونارٍ ما تشًبه بنار=ريح دخانها يا خوك كنُه بخور
وريح نعناع حايل داخل ابريق حار=يجعلك تلقط الكاسه بليا شعور
ذا ولد عمٍ قريٍب وذا ولد جار=وذا ولد خال اما ذاك شخص مخبور
ولا تمشيت غرب تشوف بايسرك غار=شف رضمت (الجريفاني) تحكي العصور
با ايمنك كان يجلس به سليل الحرار=والدي جعل ربي يرحم اهل القبور
لو سالته عن الماضي وحسن الجوار=آآه يا ليتها تقدر تحكْي الصخور
ماضي الوقت جلْ الناس كانت خيار=وكان كلٍ يثمًن له مع الناس شور
وقت لا سولفوا فينا رجالٍ كبار=نستمع منصتين ونفهم اللي يدور
ولا ومرنا اطعنا سم.. وابشر.. وصار=نحترم بعضنا والحب ملئ الصدور
التواضع كسانا يا السنافي وقار=وقتها ما حدٍ يشهد شهادات زور
الله اكبر على ذاك الزمن كيف دار=صادق اللي يقول ان الليالي تدور
وهلت دموع عيني عند مدخل مشار=يوم شفت الشعيب مكبلينه بسور