ألا ياهاجسي حرِّك وبيِّن خافي المكنون=ومر الضمير وقله يشرح لك عن سر مكنونه
والا ياخاطري عبِّر عن اللي داخلك مخزون=ومر الخفوق وقله يكتفي من فيض مخزونه
والا ياقافي المطنوخ لحِّن من قصيدي لحون=ومر الجديد وقله يبتدي في نغمة لحونه
والا ياقلبي اللي من عناء الدهر بدا محزون=مر النفس الشقيه قلها وش فيك محزونه
والا ياحالي اللي كل يومٍ هو من دونٍ بدون=مر الصبر وقله لايحول الليل من دونه
خله يجيني حالاً وانا ابستعين برب الكون=وماخاب عبدٍ يستعين بربٍ عالين كونه
يالله انا طالبك انك تمد لي من عندك عون=أنت الذي ماغيرك نرتجي من مده وعونه
جار الزمان وماقصر أثر على حالي طعون=الله يعين اللي مثلي حاله تزايد طعونه
والناس ماتدري وانا مابغاهم عن حالي يدرون=أعيش وهمي البشر ماهم لزومٍ يدرونه
وختامها صلوا عدد مانشت من الغربي مزون=على النبي صلوا عدد مالاح البرق بمزونه