هب البراد وقرّبة طلعة اسهيل = القيض راح والأحارير زاله
أتلا الأناثي طلعته تالي الليل = نجمه توقّد زايدن بأشتعاله
وجانا من الغربي مزون مظاليل= وغشاء على روس النوايف اظلاله
تضحك مقاديمه وترشق هماليل= حس الرعد والبرق بمظلم اخياله
تمطر جنوب وشرق وغرب وتشاميل= وعلى النفود ومنخفض من سهاله
والعشب نبته ظلل الأرض تظليل= نوار نبته كاد يضحك جماله
لونه جميل وجمّل الأرض تجميل= وربّع به اللي مهزلن من حلاله
والبر زان وحمّل الشيل تحميل= مع رفقة اللي يدركون الجماله
هذاك قدّم موتره وحزّم الشيل= وهذاك يحضّر مابقي من دلاله
تواعدوا دار بها ينقع السيل= بين النفود وبين شامخ اجباله
نبت الزبيدي والجباء بالهذاليل= أما جنوبي كبد وإلا شماله
تجمّعوا ربعن قصيد وتعاليل= على ضياء نار رجاله شكاله
والكيف طاب المتعبين المعاميل= جلسة شرف ماهي بجلسة نذاله
تبادلوا بالهرج ربعاً مشاكيل= والسالفة تقضي ويأتي بداله
سوالف تونس حضور الرجاجيل= تعرض على اللي حاضره من رجاله
بها نونّس هاجس ضدّه الميل= ننساء هموم الوقت وننساء خماله
البال به ينساء هموم وبهاذيل= وينساء مشاكل كل شيء جراله
وختمت قولي في صلاة وتهليل = على الرسول اللي مشاء بالعداله