عساك يا حايل عقب طول الأمحال ‍=يسقيك غيمٍ فيه خير المنافيع
رخم المزون اللي مسيره بالأمهال ‍= الناشيات الراعدات اللواميع
بالغيث بأمر مكوّن الكون حمال ‍= لأمر الكريم اللي خلقهن مطاويع
نشوٍ من القبلة يجيلك بالأقبال ‍= ويهب من يمة سقيّا ذعاذيع
غيمه يصير طبوق يلتم بالحال ‍= سيره بطي يا جاك ماصار تسريع
ينفك مخزونه من الجو همال ‍= وبلٍ يميّع يابس القاع تمييع
على شعيبك يصطفق سيل الأجبال ‍= وهاك التلاع وكل ما صار من ريع
سيلٍ قوي يضرب من الجال للجال ‍= برحمة مغيث الناس من غير ترويع
ويا عفتي الما عياف وإديرعك سال ‍= عقبه اسبوع العشب غادي فقاقيع
واليا اكتمل نبته عقب مدة وطال ‍= يلقى الزبيدي بالمنابت مصاليع
ويصير به للبدو والحضر منزال ‍= لراعي الحلال ومن يحب المطاليع
يموج نوّاره له ألوان وأشكال ‍= من كل نوع لطاغي العشب تنويع
خيره يعم ديار جزلين الأفعال = ‍ شمر ومن معهم بكل المواضيع
وباق الديار أرضه من السيل تكتال ‍= وللناس بدياره تزين المرابيع
يا دارنا نذكرك بالواو والدال ‍= ومن حقنا بك نفتخر حيل ونذيع
يا حايل انتي عندنا مالك أمثال ‍= وفي كل ذره من ترابك مطاميع
دايم هلك وافين في كل الأحوال ‍= وعلى العداء يوم الحرايب قواطيع
زينين للصاحب وسوٍ لمن عال ‍= يا جاء نهارٍ به تشيب المراضيع
يوم المعارك يشتهر فعل الأبطال ‍= ستر البنات مخضبات الأصابيع
في ساعةٍ جمعٍ على جمع ينهال ‍= والبيض من هول التلاقي مفاريع
شمر لهم فوزٍ على روس الأقذال ‍= نصرٍ من المولى وحظ وتسانيع
شجعان وكرامٍ بلطف ونقا بال ‍= وسلومهم ما به عيوب وقواميع
والجار محسوبٍ من العم والخال ‍= لو كان من ناسٍ بعادٍ مقاليع
أحفاد حاتم بالدجى مشعل النار ‍= ناره تصوّت للسراة المجاويع
دايم وبيته للخطاطير مدهال ‍= ما بين يستقبل وما بين توديع
حاش الغنايم والفضايل والأنفال ‍= وذبح جوادٍ تخدمه بالمفازيع
شمر على طيبه ليا تالي التال ‍= هذا كلام الصدق ما فيه ترقيع
وصلوا على منهو عن الحق ما مال ‍= ما صار بعذوق الغروس المهانيع