لو كنت يا صاحبي باللبس متنكّر = زولك علي ما يخفى بتغير لباسه
يامشيت الضابط اللي تتبعه عسكر = يفهم بكل النظام بفن ودراسه
ما تدري اني ما غير اطريك وآفكر = واقول حبك يدوم او ينهدم ساسه
سلّم وسولف علي وآكون متشكر = يا فرحة القلب ياهمه وهوجاسه
كلامك احلى من احلى الشهد والسكر = وأطعم من اللي من الناقة الى الطاسة
يا خنّة الفيضة اللي وسمها بكّر = من كل عطرية الاعشاب محتاسه
ولك مبسم فيه خمر لو شِرب سكّر = خمر الهوى لا بقاروة ولا كاسه
وياعين حرٍ على المرقاب يا وكّر= متعلي بالرفيع بمنتهى راسه
والفكر مشغول بك والجو متعكر = ما وسّعت صدري الديرة ولا ناسه
انا لما بيننا من حب متذكر = ماني مثل عاشق ٍ متبلد احساسه
يا شيخة البيض غضات الصبى البكر = يا قمة الزين بانواعه ونبراسه
إن كان باب الهوى من يمكم سِكّر = على كذا المهتوي يعلن عن افلاسه
افلاس فلاّح بأرض ٍ عقب ما حكّر = كلى الجراد الحكير وضر غراسه