سلام والمسلم على السنّه ومبداه السـلام = واللي من الشعّار ودّه يمسك المايك يقـوم
نبا نسوق القاف بالمعنى على صفحة سنام = وناخذ ونعطي بالكلام ولا نبيّـح بالعلـوم

يامرحبا بالشاعر اللي جاء على حسب النظام = لو كان غير في النوايا البيض وإطبوع السلوم
عبدالله الروقي يحسب انه يجمل فـي المقـام = ترى الحقيقـه مايـرد العلـم قـدام القـروم

ما انته بأخو عنتر ولد شداد يالقرم الهمام = لكن فيك اطبوع من عنتر ليا شن الهجوم
ترى المعاني كلها يا صاحبي فوق الحزام = ماينضرب تحت الحزام الا الهلايم والرخوم

ترى الليال البيض معروفه من الليال الجهام = وانصحك ياطير النهار اليا بغيت تحوم حوم
مابغاك ياعبدالله الروقي تدور فـي الظـلام = اطلع معي قدام وابشر بالسعد عندي وروم

الوقت يافايح تغيّر والسماء وسطه عسام = حتى البواخر فالبحر يا صاحبي عيّت تعوم
البشت والشنطه مع الرجال مافيها كلام = والمشكله كان انها وصلت ليا فرك الخشوم

ما صار غير الطبخه اللي لا حلال ولاحرام = وكر الحرار اشوف فيه غراب مدري فرخ بوم
والمشكله لا جيت اقايسها على سعر الدرام = اشوف نفسي صايرن مظلوم جداً وإمهضوم

الظاهر انك لو تحوش من الغرام احلى الغرام = وإذا استرحت من التعب ياصاحبي لازم تقوم
دكتورك اللي ينصحك اياك عرشـك للعظـام = وانته ماتشبع من عظام ظبا الديار ولا اللحوم

مادام للعساف بشت وللبشر قلّ احترام = اموالنا ضاعت وحنّا لا نبيع ولا نسوم
وضّحتها لك يالعصيمي جعلها برد وسلام = واختامها عندك وانا يالقرم وفيت اللزوم

مدامك تضيف يابو طلال ضيفك ماتـلام = يمنا ً نديه ماعليها لو صاحبها محـروم
انا التمس معناك يارجال والمسك بكـلام = ياجعلها في قلوب خلق الله ياعبدالله تدوم