الطرقه اللي سطـّرتها الدواوين=مثل البياض ،،، بوبـْلها حاتميّه
اروت جفاف عروق قلب وشرايين=بعد الظما والجوع والمهـْمهيّه
قسوة ضلوع ٍ بعض شدّاتها لين=والذيب يقنب في صباح وعشيّه
ما بين حلم ،، وانتباهاته ،، وبين=صحوة عروق ٍ لو غفتبي نديّه
صار الصدر بستان ورد ورياحين=بالوصف .. كنـّه روضة ٍ بابليّه
ينبض بها الخفـّاق طلق الحجاجين=معها الشعر ينطق : ( بيالله حيّه )
قلبي وقدمـّته من اوّل .. وهلحين=تتبعه روحي في طريقه هديّه
شيك ٍ مجيّر في رصيده ملايين=تكفي ملامح هــالصباح الطريّه
لعيون من تامر على القلب والعين=( وحده وتسوى في عيوني بريّه )
يالملهمه ... اهلاّ .. هلابك وسهلين=تربـّعي ... بالشعر والابجديّه
تطمـّني ما فيه غيرك مقيمين=ياللي أقمـْتك .. لين صرتي هويّه
تبختري من وين مارحتي لوين=وحقـّك علي انـّي اصون الوصيّه
طفل البراءه في رياض البساتين=تبقى حياته في حياتي هنيـّه
متيقنه منـّي .. ولاضن تنسين=بشير ،، ما يمشي دروب الرديّه
الوجه واحد ما وطى دربه الشين=سجيـّة ٍ يا حيـّها من سجيّه
ورث ٍ ورثته من قروم ٍ مسمّين=وقت العزاوي عزوتي شمـّريّه
للود .. والاحساس .. والورد والتين=قمـّة شعوري نقطة ٍ جوهريّه
لو سولفوا .. أو طعـّنوا بالسكاكين=ماني بزبون اللي تقفـّى خويّه
متوكل ٍ بالله على العسر واللين=ولاخاب منهو يقتدي في نبيّه