صبري تنهـّد بالالم وضلوع صدري كالحطب=اخشى عليها تنكسر وآضيق من حطـّابته
مجهم عبوس وساعته قامت تقطـّع بي غضب=شابت عقاربها معي والقلب فيها كابته
للطنخه اللي تنتخي للشمري لادنى سبب=ضاع السؤال بواقع ٍ يفرض علي اجابته
ماهي بلحية عدّها يبغى لها فتلة شنب=انا لها وقت الجلل يوم المقادم هابته
اضرب على الموت الحمر ما همّني منهو ضرب=اكسن على درب الخطر وعزوم حيلي ثابته
ماهو بهروب ولا عذر والقرم مثلي مايهرب=دام الطنايا لابتي ،، يا عز منهم لابته
يوم ان بعض الناس في وضعه معَ من غلب=حنـّا لفنجال العنا سوقوه يا صبّابته
تشهد مواقف ناصعه فيها خذينا اعلى الرتب=وكل القبايل حقّها محفوظ ياكتّابته
لعبة كراسي وقتها يمشي شوي وينقلب=غصب ٍ على من دارها وغصب ٍ على عصابته
في فوضوية عالم ٍ مستاء من وقت ٍ كذب=ضاعت معاريف الفضا وضاقت بهم رحابته
لو لعثم المنفا كلام الحق فكـّاك النشب=الحر حرّ ٍ لا شلع ،، والا بقى فمركابته
لا بد ما يهب الشمال وينجلي كل التعب=يروق قلب ٍ في ضلوع الصدر مبطي كابته