للجود وقت وللشكاله مشاكيل=تبقى مئآثرهم جواهر فريده
وللبوح زفره كنّها درهمة خيل=قلبي زفرها وارهمت في وريده
ان شلتها سمرة شعور ومواويل=جامح خيال وبالجزاله عنيده
جتني تهادى غيمة ٍ كلها سيل=برقٍ سبقها والفواصل رعيده
هتّانها رشّه من الصبح لليل=ورد الثناء عنوان بيت القصيده
للشامخه بنت الرجال الحلاحيل=قمرا سماه وبالخطاوي سديده
ساقت مشاعر للنشامى فناجيل=وآنا على كيف النشامى أعيده
لاهبهب النسناس وشبّت قناديل=المعجزه ثارت على ما اريده
اصالةٍ عني من الجدي لسهيل=ونيابة ٍ عن كل قرم ووليده
شكري وتقديري ورود واكاليل=لاجلك غمرتينا فبصمة اكيده
قلته وانا بلويش والجد بزميل=والساس في زوبع وشمّر بديده