حظيـظ مـن يصبـح مـن العقـل مسلـوب=مـــــا يــجــرحــه لــــــومٍ ولا يـــبـــدي عـــتـــاب
ولا تـشـغـلــه دنــيـــا ولا هــجـــر مــحــبــوب=ولا يــمـــيّـــز بــــيـــــن ربــــعـــــه والاجــــنـــــاب
مــا هــو سـواتـي جـوفـه وجــار مشـبـوب=جـمـر الـغـضـى وســـط المعـالـيـق لـهًــاب
لا قـيـل وش بــك قـلـت : تكفـيـر لـذنـوب=ذنْـب الوفـا عنـه ابيـض القلـب مـا تــاب
حـيـاتــي الــلــي روحــــت كــنـــت مـنــهــوب=لـــو حسـبـوهـا مـــا ســــوت حـفـنــة تــــراب
لا واحـسـافـه كـــان مـاعـشـت مـحـســوب=ولا حـصـل لــي مـنـه يــا كـــود الانـشــاب
انـــا عـلــى امـــري دايــــم الــــدوم مـغـلــوب=وش عـاد ينفعنـي لــو ابـديـت الاسـبـاب
مـانـي عـلـى سـلـم الرجـاجـيـل مـغـصـوب=طــبــعٍ ورثــتــه قــبــل يـنـبــت لــــي الــنـــاب
درب الردى صوبٍ وانا عنه في صوب=مـانــي مـــن الـلــي لا حـكــى قـيــل كـــذاب
ولانــي مــن الـلـي نظـرتـه داخــل جـيـوب=ولا ني من اللي لا مدح ينطـر حسـاب
الــمــرجــلــه مــــاهــــي عــــبـــــاةٍ ولا ثـــــــــوب=لا مـــن بغـيـتـه تلـبـسـه لـجــل الاعــجــاب
الــمــرجــلـــه قـــــــــولٍ وفــــعـــــلٍ ومـــــاجـــــوب=مـــــن طـالــهــا لازم يـبــرهــج لـــــه الـــبـــاب