كبتن الطائره در بي شوي ابي اشوف=ديرتي من قريّب طير حدر الغمام
رح لجال النفود وعود لخشم ( نُوف )=بين ( سلمى ) و ( اجا )در فوق ذيك الحزام
انت خلك على المقود ودعها تطوف=وكان ما ودك تشاهد توسّد ونام
شغل ( البايلوت اوتو )وثنّ الكفوف=طائره صنع ( يو اس اي ) تطيع الكلام
ابي امتّع نظر عيني ويستر جوف=وابي اوزّع على ضلعان حايل سلام
وابي ما تلحق(ن) لاغبت عنها حسوف=وابي ابرّد لواهيب الهوى والغرام
وش يضرّك ليا منك عملت معروف !=تلبية رغبة متيّم بها مستهام
اكسب اجر الذي جارت عليه الظروف=غربته لحظة(ن) ياخوك بالفين عام
بسرة القلب حايل نبض كل الحروف=اشهد ان الذي ولّع بها ما يلام
به على كل ديره ضمّه الكون نوف=من يلوم الذي في دانة الحسن هام
حايل العز والنخوه ولمع السيوف=حايل اغلى بلاد الكون شرق(ن) وشام
من زبن في حماها ما يلازمه خوف=حايل المرجله والطيب من عهد سام
لو تحاول توصّفها تعجز الوصوف=نايفه دايمن با الوصف مثل السنام