سمعتوا يا أهل حايل بمشروع بالقطّه؟=مديره حرامي بس ماهوب بمبيّن
تغيّب ورى كذبة هل الدين وخططّه=علينا كذب كذبة انا شخص متديّن
وابي الاجر لاخواني وللشام بآحطّه=مساكين ما يلقون مصروف بالهيّن
ذبحهم ربع بشار والجيش وشرطّه=وودي بكم ريال يفرحبه حزيّن
وجات البشر تركض مساكين مشتطّه=تبا الاجر مادامه كم ريال وهويّن
عطيناه ما نملك من المال بشنطّه=وتركناه ماندري وش يحوس ويزيّن
اثاريه يا ربعي خذا المال ثم لطّه=وحنا نحسبه راحم الشام وحنيّن
هل الشام ما شافوا ولا ريال او شطّه=علينا لعب لعبته بالدين يا ذهيّن
سرق مالنا بأبشع أساليب منحطّه=على رتبة مهندس من الكذب متعيّن
غدا تاجر وكرشه من الزود مصفطّه=من المال لو جيته يسلّفك ويديّن
نصيحه لا تاثقبه ترى واجد ورطّه=يورّطك لو جالك بالاسلوب متليّن