تدري خفوقي صابه الفين لايف = من عالمٍ عاشت على الكذب والزيف
إلى سمعت اهل العقول الخفايف= تنهق وكنه من كبار العواريف
يضيق صدري وانتحي عنه عايف= المجلس اللي جاب اردا السواليف
ياصاحبي ياحلو ذيك النوايف = اللي هواهن يالنداوي على الكيف
اللي يصيبك يوم تذكر حسايف = على زمان راح صيف بثر صيف
يوم القلات وكل خبرا نشايف = وخطو المصامد للجوازي مذاريف
تبكي على اللي ضاريٍ للكسايف = ولا يحسب للشقى والمصاريف
اللي زهابه صافياتٍ رهايف = قطم العقوب مدربلات الشواخيف
اللي إلى ثارت صداها صلايف = كنه بعال الروس لجت عواصيف
هذي علومي وان بغيته طرايف = جبته على اللي يرقبن المشاريف