شنّت عليّ الدواير حرب واجهادي=حتى عجزت آتصدى غاره وغاره
عجزت أناحي زمان ٍ طبعه السّادي=في زوبعه مالها مركز ولا شاره
به راس مالي ذلول الفكر وشدادي=بيض النوايا بعصر الزيف منهاره
تغيّر الوقت والأعراف تنقادي=من قمة السّلم صوب الجرف حدّاره
والشيمه اللي تتوج روس لمجادي=راحت قيمها وخانت قصرة الجاره
وشوف المظاهر طغى بالجوهر وسادي=وما كلّ لولو يزيّن شوف محاره
واليد وإنْ مدّت المعروف ما فادي=في ظلمة الجحْد والنّكران محتارة
دنيا غريبه تجانس فيها لضدادي=حتى تخاوت سباع الغاب والفاره
وذيب النّوايف بعد ما كان يصطادي=أصبح فريسة ثعالب صيد مكّاره
والحر لا من وقع بالشرك ينصادي=ويصبح أسير الوكر في سبق صقّاره
والواقع المرّ نخفي صورته.عادي=مثل المسارح تحجب الواقع ستاره
نخدع ونكذب ونمكر زيف واحقادي=والناس تبغي تزيد المسرح إثارة
يا حكمة الماضي الأمثال تنعادي=مثل المسلسل به الأدوار مختاره
والفقر بالحكمه أقوى من فقر زادي=وسقم العقل ما يفيده طبّ واعطاره
ممكن تعين الفقير ابمدة أجوادي=بس الغنى لا تعلّم صيد سنّاره
وسط البحر درّ كامن وانت صيادي=والبوصله عقل راجح عرْف بحّاره
لكن على الله يزين الحال باعبادي=جبّار وحده تعلّى فوق جبّاره