عقب الإجازة يابو عارف وراكا = فيك التعب من جيتك معتريكا
منته جواد ولادري ويش بلاكا = مدري تعب وإلا هموم تحديكا
أسألك خايف من زمان حداكا = أعرض عليك أكون لك به شريكا
كان أنت مضيوم تقلد عصاكا = وأفزع معك وآخذ عصاي السميكا
ولكان هو مال يعله فداكا = ألي بحوزتنا رخيص عليكا
وإن هو مرض نطلب من الله شفاكا = نطلب عسى رب العباد يحميكا
نجيب لك دكتور ياصف دواكا = كل الأطباء نزهمه لك تجيكا
إنته أخو وحسب جنابي أخاكا = أخوك يفزع فزعة مانسيكا
أزهم وحنا لك نلبي دعاكا = ونجيب ماتحتاج لو من أمريكا
لعاد بالدنيا رفيقك نساكا = ماينفعك لامت لو هو يبيكا
تر زينة الدنيا وغاية مناكا = لاصار ربعك كلهم تحتريكا
وبالبير مايظهرك رجل رماكا = والي كتب ربك لزوم يجيكا

عاش الهميم بفزعته ماتلاكا = الي معي دايم بهذي وذيكا
عبد الكريم إنته طوال خطاكا = بالفزعة الي وارثه من أبيكا
نذكر لك الفزعة ونشكر ثناكا = والكل يذكر نية الخير فيكا
كم مرة جربت وافر عطاكا = مر هدايا ومر كاش وشيكا
عساك ذخر دايم لقصراكا = وجماعتك وبناك وايضا أخيكا
الله يحققلي هواي وهواكا = ويفكنا من كل درب دريكا
ويالله يالي كل حي دعاكا = يالخالق الرازق ولا لك شريكا
يالله نطلب فزعتك مع رضاكا = يالي على كل الخلايق مليكا
يافارج الشدة ولحد سواكا = تفرج لمنهو بالفرج يحتريكا
تفرج هموم يالولي ماتخفاكا = نطلب تزيحه في زمان وشيكا
وشكراً يابو محسن نقدر وفاكا = وهذي هي الهقوات والظن فيكا