الكلمة اللي ماتمسّ بكرامتك=افتح لها بابٍ وتكفي بها الريح
والغلطة اللي من رفقيك لياجتك=لاتبادل الغلطه بغلطه وتجريح
خلك جمل شيّال عثرة جماعتك=صندوق ماتفتحه كل المفاتيح
وترى الصبر طيب ويرفع مكانتك=ومن لاصبر لابد من يومن يطيح
وان صادفك مايثير غيظك ونعرتك=بعض الأمور تحتاج وقفه وتصحيح
تبقى الرجال رجال مايدخله شك= وتبقى الجبال جبال ماتهزه الريح
وبابٍ يجيب الريح ترى يلزمه صك= وبيبان تُفتح للوجيه المفاليح
وترى الرجال اشكال وانت ومعرفتك=فيهم مسابيحٍ وفيهم طحاطيح
ورجلٍ تمنى يكون من ضمن عزوتك= ورجل تمنى عنه بعد المراويح
ورجل تهقابك وبالفعل عند هقوتك=ورجلٍ على ماقيل خيال تصفيح
ودقق وحقق بين عرفك وحكمتك= ترى الليالي بالخفايا لواقيح
وانت الذي بيديك مقياس حالتك=احفظ مقامك.لايقولون بقريح
واشمخ شموخ طويق تكبر مهابتك=ويحسب حسابك من حساب الزحازيح
والصمت به هيبه وتكبر معزتك=وحذرا من اللي للسوالف مشافيح