راكب اللي كن نوض البرق وسط عيونه=ماتفنن فيه لا صيني ولا امريكاني
الدلع في وقفته والموت في طبلونه=لامسك خط السريع وسايه فناني
كنق في شكله وفي عزمه وفي مضمونه=مركبٍ للشيخ والا مركب البطراني
ما التفت للهاي هاي اليا بغو يشرونه=مار كبدي كنها تصلى على النيراني
ماحسدهم بس خايف لاطغو يشقونه=دري انه مايناسب كشخة الورعاني
فتك ياباني يشوّق سايقه بفنونه=شوفته تبري جروح وتكحل الاعياني
داخليه خارجيه فتنةٍ مع لونه=واهني اللي يحط فلوسه بنيساني
سايقه باعطيك من قلب الشقى مكنونه=دوك ظرفٍ مايشيل اسمي ولا عنواني
وسط درج الجيب خايف لاتروح بدونه=انتبه له وانتبه لي خايفٍ تنساني
ولا وصلت لديرة اللي شفت موتي دونه=الحبيب اللي لعب في حسبة السكراني
حط ظرفي في مكانٍ ماش خلق يجونه=بين مسجدهم وبين البيت والدكاني
اه ياكود الغرام وساعةٍ ياهونه=بين نيران الفراق وجنة الخلاني