راجي نزلت السوق والسوق به غوش = وواجهت زين الدل بالسوق ماشي
اقبل وحييته وانا تقل مرعوش = ورشيت من طيبي لوجهه رشاشي
جيت اصفه لاني في الوصف مبلوش = براقعً مايلبسن المغاشي
عينه كساها داير الفلك برموش = ارماح ربعن حولو للهواشي
والخد به لمدور الولف شالوش = برقن تمزع من عروض المناشي
ناب الردوف واهني من ناشهن نوش = وروس الثمر كنه غطاوي غراشي
والعنق ريماً جفله زيلة طروش = من روضةً فيها تتيه المماشي
ممطور تو وناشه الوسم برشوش = على اوله زملوق عشبه يناشي
اقفى وانا وقفت واقفيت مغشوش = وهو يحسب انه ماعمل بي ولا شي
وعليه قلبي من عراويه محشوش = وعليه نطاف النظاير انشاشي
وعليه مكنون الحشى يغتوش غوش = وحتى اشوايه قام لهن اغتواشي
مسلوبةً تاخذ من الزين وتحوش = وتلعب في قلوب الغلا ماتخاشي
صدفه ومرتني وانا تقل مرعوش = ورشيت من طيبي لوجهه ارشاشي