البارحة يوم العرب نومى على النومه تميل=وانا آخايل للنجوم اللي تمايل حالها
تخالف ابداع الشعر بين الجزاله والهزيل=اللي يجيب النادرة واللي على موالها
الخيل من خيّالها والشعر ذوقٍ للجزيل=والشعر من شعّارها والخيل من خيّالها
لي مهرةٍ مهرة شعر تخبط على الوزن الثقيل=صهيلها جزل الشعر ماتعترف بهزالها
اليا اخبطت بأرض الشعر دك الحوافر ماتزيل= لو زلت انا عن دنيتي صعبٍ تزيل افعالها
من بقعاء جيت املبيٍ دعوة زحازيحٍ تشيل=رد الوفاء من سلمها سلم الوفاء يزهالها
بمزاين شمر لإبلها والله لاجيب المستحيل=مادامني قدم الرجال لي الشرف باقبالها
انتم صناديد الرجال انتم هل السيف الصقيل=اقولها من قلبي اللي صادقٍ لاقالها
انتم مثال اهل الكرم مثل القمر ماله مثيل=يفرق عن انجوم السماء مضرب مثل لأمثالها
شمّر خذت تاج الكرم غصبٍ على خشم البخيل=يشهد لكم تاريخكم في دقّها واجلالها
شمّر مواريث الوفاء شمّر شفاء روح العليل=اللي تعلّه دنيته شمّر سعد من جالها
شمّر لاثارت للوغى عدوهم يمسي قتيل=متكاتفين اليا طنوا متعاونين ابطالها
طبع الطنايا لاطنو - وادي على كبره يسيل=من ياقف ابوجهه جرف روس الرجال وشالها
وساع الطعون اليا اطعنو دخيلهم ماهو ذليل=كبار الصحون اليا اكرموا ماحسّبو لأموالها
الشمري عز الخوي وقت المراجل مايميل=بيئة شموخه من جبل مثل الجبال ارجالها
وانا عتيبي ارتقي بالمعنى والعقل النبيل=من لابةٍ منزالها فوق الجدي منزالها
ومامن قصورٍ بالقبايل لا ولافيهم قليل= واليا مدحت امدح كفو شمر كفو فنجالها
حقٍ علي رد الوفاء لأهل الوفاء قدح الفتيل=اليا قبس بارودها صيد الجزل منوالها
الله عطى والله خذا والله وهب والله جليل= والله يبيض وجهنا قدم الفحول ارجالها