قصرت رجلي عن تعاليل الأجواد = لوبه وناسه من خطاء الناس عفناه
عفناه من ناس تعاند به اعناد=من واحد يجيب حيله على أقصاه
يهجم بلسان جارده تقل هدّاد = ويزعل يامن قلت ندخل على الله
على الظلايم وسب الأجواد معتاد= ويحكم عليهم والخطاء ماعرفناه
وشعبيته مابين ناشر وجرّاد= طباعيه بعرض الأوادم مشقاه
قسماً بها نجّار وهذاك حدّاد= مليص ودهان يرمم خطاياه
وصحف وجرايد بثها فاق الأعداد = مدير ومامور وناشر اعلاناه
ولاينفع الديكور والبني منباد= كان القواعد صبهن ماضبطناه
وسود الليالي يكشفن صدق الأوكاد = طول الزمن يكشف أمور مخفاه
يبين به صدق الرجل ويظهر الجاد= والله كفل كشف الأمور المغطاه
تفرق حلوم الليل عن علم عوّاد = ويعرف سراب القيض من اللي بغاء ماه
ولنا الشّرف نمشي على طرق الأجداد= اللي فعايلهم به العز والجاه
أهل الكرم وأهل الشجاعة والأمجاد = وهل الفعول اللي الزّمن سجل أخطاه
يذرون ياجار الزّمن وشحشح الزّاد= وتصبر على عجف الليالي وبلواه
يامازبنهم من شكاء الظيم ياعناد= يوم اللقاء وظيم الليالي توطاه
بالقيض حفياء مع رهاريه الأنفاد= مهالك راس الدليله بها تاه
مضامي حيل النجايب معه باد= بديار غرب والمسافات مظماه
خويهم جابوه من دار الأضداد= يوماً عظم الساق مايحمل أعضاه
يركب على الأمتان كنه على أشداد= كنه على شقران بالمشي يقداه
بالقيض حفياء لامياه ولا زاد= خمشة عشر ليله على الوجه ممشاه
هذي الفعايل وأنت يالقرم نشّاد= ياعايش عصر التّرف والمباراه
واليوم من زود الأمن بخير واعياد= في وقتنا توالف الذيب والشاه
وصلوا عدد ماقام راكع وسجّاد = ماشعشع البارق وسالة شغاياه