سلام ياحلو النباء .. والشعر زان=وحـروف شعري .. مزنته حاتمية
همالها بفياض .. ذربين الايـمان=تمطر على (صبحاء) بنجد العذيه
للصاحب اللي وقفته شانها شان=( بندر )أبو محمد ..وطيبّه سجيه
مرحوم من رباك يا شبل قحطان=( الخنفري ) يا سْعدّ منهو خويه
شبلٍ ينومس لا حضر موقفه بان=خيل المراجل .. في يدينه مطيه
يا حيّ فاله .. وين ما روّح وكان=خطو الولد يسوا من الناس ميه
حاوي على فعل المكارم بليهان=عسى الولي يحفظك رب البريه
من لابتٍ تثبت بروغات الاذهان=مثل الجبال الراسيه والقويه
قلته لـ أبو محمد محبه وعرفان=ومن دافع التقدير هذي وصيه
أنا يمينك .. يارفيقي ولا تهان=زبن الجلاوي عزوتي.. شمريه
رفيقنا بالعز من ماض الازمان=من دونه الأرواح .. تنثر دميه