نورك يغطي مطلع الشمس لابان=فيه الرضا والرزق بأول صباحة
الله ياهالفجر كم صرت شفقان= لمعانق الراحة اذا فيه راحة
شفني يافجر النور عايش وتعبان = دخيلكم مافيه وقت استراحة
ابي اتريح بين وردٍ ورمان= بضلال رمشٍ في ضلاله فساحة
واهل دمع العين من فوق الاوجان = واعلمك ليه دمعة العين طاحة
واغفي على صدرك اذا كنت زعلان= كني طفل يشكي العلل في صياحه
واهمس وانوح بعالي الصوت هيمان = واجاوب اللي فوق الاغصان ناحة
ياصاحبي هو باقي ٍ لي بالامكان = على الطريق من الزهاب اصطباحة
فاقد حنان وينتظر وبل هتان= يرسم ملامح بعد حزن انشراحه
لاصرت انا للهم والغم نيشان = لا والله الا دلة العقل فاحة
وش شرهة الضميان لاقيل ضميان = الا لينبوع الغلا من قراحة
غربة بذات الروح في وسط الاوطان = والدرب موحش ماحسبنا سلاحه
لو شفتني يافجر مقفي وزعلان = منك العذر ياصاحبي والسماحة
هذا الزمن مافيه شفقٍ وولهان=وقاحةٍ ياكبرها من وقاحة
اما انت يافجرٍ سطع والفضاء زان = تبقى كريمٍ في زمان الشحاحة
وتبققى كما ديمٍ من المزن هتان = وتبقى ثمر عمرٍ نبت له بواحة
ويحيط بك فلٍ وجوري وريحان = وهديتي لك قلب حطك وشاحه
تبي الصراحة خاطري بعدكم شان= هم ونكد يافجر هذي الصراحة