ليت العمر يهـدى وبهديـك عمـري=تستاهـل الأيـام يـا زهـو الايـام
لو الهوى المحبوس في جوف صدري=يظهرعلى العالم غشى العالـم اهيـام
فيني غرام فـوق محمـول صبـري=وفيني خيال فوق تصويـر الاحـلام
صباحي اسرح لك وفي ليلي اسـري=والى هجع فكري خفوق الهوى قـام
والله مالـي غيرالاشـواق عـذري=واللي عرف شوق المواليف مـا لام
يا من يبيع الصبر يا ناس واشـري=محتاج كل الصبر واصخـي بالاقيـام
يا مالك امري وش نوايـاك بامـري=ارحم خفوقٍ عن هوى غيركم صـام
حالي غدا مثـل المساويـك مبـري=يا بـاريٍ حالـي ترىالبعـد ظـلام
ادري بحالك وانـت بالحـال تـدري=يالله عسى ذا العام احسن من العـام
ليت العمر يهدى وابهديـك عمـري=تستاهـل الايـام يـا زهـو الايـام

شبيت نار الشوق وأشعلت جمري=بين الضلوع يسارجه ريح الأنسام
أربع سنين أذوب في كاس خمري=وأصد جيش العشق بسيوف الأحلام
نخل إنتظاري في رجا عذق تمري=أبطا وأنا في عيون شرهات الأيـام
(يادايم السيف) أمر الأقدار وأمري=متناقضين إثنين والطـرف مانـام
القلب عش الحب والشوق قمـري=هزّ الغصون وردد ألحـان وأنغـام
ليت الدوى في ملة العشق يبـري=وياليت من هو لامني فيـه ينـلام
كتبت في خدود التباريـح شعـري=ورجعت مزقته وكسّـرت الأقـلام
تهاوت أوراقي بعد جـفّ حبـري=واللي كتبته كله أوهام فـي أوهـام
أحس حتى الشعر ما يطلق أسـري=أتعبت صدق الحرف وأتعبت الأقدام
ومع كل هذا قلـت يفـداه عمـري=فدوة عيونه (والرضى سيدالأحكام)