لو كــلّ من دوَّر على الجـــاه يلقـــــاه= كان إستوَت والطـّيـْــب يفقِد معــانيه
ولو تستوي مـراتب النـّــاس والجـــاه= تضيـــع من بين الرّجــال المشــاريه
ويبقى المميّــــز ماتميَّــــز مزايــــــاه= ولايُعرَف الخــــايب ولو فيه مافيـــه
وترى إختــلاف النّاس من حِكمة الله= وكــلٍّ محاصيــــله تبيِّــن دعـــــاويه
حتّى ليامن حِـدّ كــــلٍّ على أقصــــاه= يبيــن من فِـعْله ينـــومس بني خيـــه
تصــوّروا، والمجتمع دولة أشبـــــاه= وشلـــون نلقى من يجـــامل معاليـــــه
من يخدم اللي غـــرّته حيــل دنيـــاه= وهو يدري ان الله يميــــته ويحييــــــه
من يمــدحه، من يغضِب الله لرضاه= وليــا تضـــايق خاطره، من يسلـّيـــــه
من يعتني قصره، وبشته، ومركــاه= ويصيـــر له ســـوّاق ولاّ يقهــــــــويـه
من يحْـــرُس أمواله ويحفظ رعاياه= وليا تدلـّـــــت كـــرشته من يداويـــــــه
هــذا هو الــــواقع،وحنـّــا رضينــاه= دربٍ لنا من بدّ الاجنــــــاس نمشيـــــه
لو للخطأ يمشي مشيـنا على خطــاه= ولااحْدٍ ولو شــاف الخطيّـــه يخطّيــــه
وفي حَضْرته كل المعاني عكسنــاه= والشـّـي بغير اللـي عِـرِف به نسمّيــــه
صِرْنا نخاف الصّدق والكذب منجاه= وراع المبــادي يستحي مــن مبـــاديـــه
كـــل الأمم فـــاقت وحنّا بعميــــــاه= الله يعـــزّ البيــــه ويخلـّـــــي البيـــــــه
ومعذور راع الجاه لو جاهه أغـواه= مــادام من حـــوله يزيّـــن مســـــــاويه
يرعى بظِلّ حمـــاه ويكمّم افـــــواه= واللّــه ماادري ويـــــن ودّه يودّيـــــــــه
واللــي مشى بالدّرب مثله وشرواه= ماذاق من كــــاس المذلّــــــه يكفّيـــــــه
امّـــا يعـــود ويمكن العــمْر باتـلاه= ويســـتدرِك اللــي باقيٍ من هقـــــــاويه
ولاّ ياعلَّــــه هفّــــة مقيــط ورشاه= ولـــومك على اللي بعد هذا يماشيــــــــه
ياهاجسي كلٍّ تغنـّــــــى بليـــــــلاه= وانا على ليـــلاي دوّهــــت تدويــــــــــه
خاف الكلام وصـوّتت صرخة الآه= بـسّ العزيـــــز مصمّــه الله ومعميــــــه
العـــزّ طــاح ولابقى غير ذكــراه= متى (صلاح الدين) يــرجع ويبنيـــــــــه
ياصاحبي ليل الهوى طاب مسراه= مـــادام طــــال الوقت في رحلة التّيـــــه
نبــعد عن زحــــام المدينه بليّـــــاه= كـــلّ الشــــوارِع صارت عيون ووجيــه
والآدمي لو كــــلّ شـيٍّ تمنّـــــــاه= بشْــتٍ على شيـــخ الــعرَب مايدفّيــــــــه
يكفيـه ماسـاقت له ظروف دنيــاه= ليــــــه يتضـــايق دام ربّـي معافيــــــــــه