تركت أرض المطار ولا حسبت حساب للاخطـــار= رقيــت الرّيــــح ياالله ياعسى لي بالسّــــماء خيـــــره
تركت الارض واطلقْت العنــان لســـابح الافكــــار= تســــاميـــــت بخيــالي عن جميــــــع النّــاس والديره
لقيــت إن الفضاء يشـبه خيــالي، والغيــوم أشعــار=وانا شــــــــاعر، إذا الغيْـم الشِّـعِرْ فالبرق تفكيـــــــره
ضَرَب حِيـْـل السّحـايب ولـْـقَحَت واهتلـّت الامطار= سِقَتْ كِـــلّ العطــــاشى والشـّــجر غنّت عصـــافيره
رسمـت بريشة الشـّــاعر، وانا في موقع الطـّيــــار= يحسّ الارض في كفـّـــــه يشكّـــــلها بتصــــــــويره
يشـــوف الخـــافي اللي ماتشـــوفه باقي الانظـــــار= يشــــوفه من ثـــلاث أبعــــاد ويطـــوّر تعابيـــــــره
تقــــــاربْت المســـافات وبــدَت كل الكبار صغـــار= بعيـــني، وانعَكَس هـــذا على المشـــــوار والسّيـــره
وتعلـّـــمت إنْ ماللكـــــون آخِــــر والــفـَــلـَك دوّار= وإنْ الارض هي واللــــــــي عليـــها كنّــها شْعِيــــره
وإنْ الكــــون فيه أســـرار، والله يــعـلم الاســــرار= وتَـقْـدَر تخْتِــــصِر كــــل المــــدى هـــذا بتكبيــــــره
- ألا ياهـــــاجسي لاتشتكي لي والهمـــــوم كثــــــار= تــراك أشغلتني يكفي خـــــــلاص وفُضّ هالسّيــــره
واذا ماتعــكس التيــــار خلـّــك خــارج التيـــــــار= ريــــاحه هـــــدّمَتْ برج الحياء واجتثـّــــت الغيـــــره
تصيــــح ولاحَدٍ يســـمع وكــل اللي تبي ماصـــار=ومـدام الصّــــوت يرجَـعْ لك صــدى، دوِّر على غيـره
وســـولف لي- وانا الصّقـار-عن مايرغب الصّقار= ليـــال سهيــــــل عــدّت والــوَسِم طـلـّــــــت تباشيـــره
- يابوحاتم تجهّــــــز وانتخِب من ربعــنا الاخيـــار= قـــــرومٍ كـــل واحـــد يعـــطي الـرّجّـــــال تقديــــــــره
يسلـّــــونك وبك يسلـــــون مهما طــوّل المشـوار= ولاتلقــــى على هاكـ الوجيــــــه البِيـــــض تكشيـــــــره
على بتــــرول ولاّ واحــدٍ من عايلة جكـــــس آر= موديـــــلاتٍ جديـــــده والــدّبل من غيـــــر تحضيــــره
نبي هاكـ الشّعـــــاف اللي جذبْنا يمّــها التذكــــار= سقـــــاها الــــواحد المعبــــــود وبلٍ من مباكيــــــــره
يبـــدّل وجههــا البـــاهِت خضَر،وتغرِّد الاطيار= ربيــــــع ومن قَـعَـدْ بالبيــــــت ماتِقْبـَـــل معــــاذيــره
ويكثر خير الارض وتكتسي وينوِّر النّــــــوّار= وهــذا مع مجـــــاهيمه وهــــذا مع مغــــــــــــاتيره
ومعنا حُـــرٍّ،أشقر،فرخ،من طرْح الشّبَك،مغتـار=هَجِـرْ، والصّــدر فيه بــروز، ووســـــاعٍ منـــاخيـره
على التّــكيَه ركــاده، ويتطلّـــع كنّــه الـــــرّادار= حقَــــوق الطّـلـْـــع، وابْـشِـر بالسّـــعَد كانِه شتَل سيــره
ليـــا منّـــه لمحهــا طْيَـار،حَقّق واستدار وطار=ورقى لـَــه فـــوق، كِــلٍّ صـــاح: من هوْ يالرّبع طيره؟
بلحْـظَه زَمّ نفـسَه واختفى، ذكّــرْني بـ(بشّـــار)=وعَــرَفْنا إنّــه دَرَع بالخِـــرْب من لمْـــعَة دواغيــــــره
والايــــــاماحلا وقت المغيـــرب ياشعَمْت النار= تــــروق بخـــــايعٍ ممطــــــور تلقيـــــمه وتبهيـــــــره
- نبي نتــرك حمـــام الــــدّار واللي يعبد الدّولار=ومن يستثـــــمر الاوقــــــات بمعسّــــــل وتعميــــــــره
نبي نخرج عن المألــوف،كذا، ونحطّم الاسوار=نبي نســـرَحْ، نبي نمــــرَحْ، ولا نـــدرَى محــــــاذيره
نبي نَكْسر عصا الرّوتين لو لحظه نعيش أحرار=نبي ننـــفض غبــــار الـــوقت ونهــــوّن مقــــــاديــره
نبي نستمــــتع بجوّ الخـــلا ونقـــاطع الاخبـــار=لأنّ أخبـــــارنا ياخـــــوي من جــــــرفٍ لدحديــــــره