تضـــايقت يافـوّاز واشرَفْت بالمرقـــاب=وهبــوب الشمال تـداعب النفس بعـذوبه
تهافـتْ فَرَاش همـومنا والصدور شهاب=ومن حــاوَل يخفّف سنــاها كلَتْ ثــــوبه
كأنّ الحصى حولي لفيفٍ من الاعراب=ومكاني على المرقاب يكشف لي عيوبه
وقَفْت وبديت ألقي على الحاضرين خْطاب= وغريــب العرب ماقــــاطعوني ولانوبه
حصى،واكثر انصات ويجوزأكثراستيعاب= وبصبرٍعلى الظيم العَرَب فـاقت الطـّوبه
ســلامي عليكم ياعرب، والسّـلام عتاب=محِـبٍّ غيـورٍ واعـذروا قــاسي إسلــوبه
اش اللي حصل يااحفاد أبي بكروالخطّاب=غير المهـــايط يالــرّبع وش طلعتوا به
مزايَن بعـارين وحمــام ومعَزْ وكـــلاب=ملاييــن نصرفها والانفــاس محســوبه
اليامن تجمّـعنا،كـروش وعِقِلْ واشنــاب=وبنينا الخيام اللي على الزّيف منصوبه
وكذوب المشاعر يمدح ويبدي الترحاب=ومفــاطيح تكفي كل من يسكن (النّوبه)
وعزيز الفلــوس يقدَّم ويحشَم وينهــاب=وهَـل العلـْم هينوا والمـوازين مقلـــوبه
يقـدَّم على غيره، ولو مـــايفك كتـــاب=وإذا قـــام يخطُب ينشب البشت بعقوبه
ولاميّــز الصّــادق ولاميّــز الكـــذّاب=مسيكيـــن تجّــار الحكي كيف خفّـوا به
هذاك افتَخَربانساب وهذا افتخربالقاب=وفلسطيــن تصرَخ والمجـاويخ عيّوا به
وبقيـّـة عربنا كمّلت حسبة الحسّـــاب=وهِي من قـَبِل يونيو حزيران منكـــوبه،
من أحزان رام الله على القدس بعدغياب=إلى عبْرَة الجولان ودمـــوع بعقـــــوبه
كُتَلْ داخل الاحزاب واحزاب فوق احزاب= وهوْ حزب واحد، دايم يفوز باعجــوبه
جمــاهير حرّكها الهوى، والهوى غلاب=تُجيــد النّـكَت ويهــزّها ردْف رعبـوبه
مهــازِل عربنا زادت وللهـــوان اسباب= ولــكن رديّ العِرْف مايعـرِف عيــوبه
واذا جيْت للواقع، ترى كل ابونا اذناب=فريقيــن، كلٍّ يتبع الذّيــخ من صـــوبه
فريــقٍ يحِبّ الفرْس ويراقب السّرداب=وفريــقٍ يهاب الرّوم والرّوم مغلــــوبه
تركنا الصّـداره للـعدا والــزّمن دولاب=تفـــاصيلها من وعْد (بلفور) مكتــــوبه
مادام إن صرخَة طفل غزّه تسمّى ارهاب= أجَل قنبلة فسفور الاحقـــاد مطلـــــوبه
ومادام إن باشات العرب للعدو اصحاب=تبي تستمر غـلاّت الاجيــال منهــــوبه
وابَـدْ مايضيـع الحـقّ مادام له طـــلاّب=وترى مايصيــب النّــاس من سبّة ذنوبه