يامن يخبّرني عن الحب هو كيف=اشوف نفسي فيه غادي فتيته
تعبت اطاولها رهاة المشاريف=واقنب قنيب الذيب لامن طريته
ما هو مصدقها بياض المحاليف=ولّي هنا فيني بعينه قريته
الترف راعي حور جذّاب ومخيف=الموت بعيونه دعاني وجيته
ماهو بكيفي سوقة الراس للسيف=ذبح المتيم في هواها لقيته
معشوقتي وينه ووين التواصيف=محدٍ عليها جاب شيٍ ابّيته
كل القصايد والغنا والسواليف=معسوف زينه والحلا شدت بيته
لها لها عوج الرقاب المهاريف=حتّي خفوقي لو نهاني عصيته
ياجنّة الدنيا ليا مرّني طيف=بالله قولي له تراني فديته
قولي لطيفك ما ابي ظلم او حيف=الحيف انّي قلت ياقلب ليته
اجمل امل انّك تعيشه مواليف=والحب ما يفضح ولو ذاع صيته
ابي غلا غيمه زها منّها الريف=دام الغلا دربٍ لعينك مشيته
انا كتابٍ ما يجي فيه تحريف=اقرا وتلقا كل شعرٍ نخيته
علمتني شعري وانا قبلك معيف=اكتب وشقق كل حرفٍ سريته
واليوم قيفاني رجالٍ ملاقيف=يالعنبو حي القصايد وميته
يلّي عرفت العشق وتقول هو كيف=هذا خفوقي دون شوفه فتيته