البارحه ما بين راحل و نزّال=تبرق حروفي مثل برق المخيله
أراقب المنشى على كل الأحوال=وأرجع على ماضي السنين الجميله
الشعر خيل وفوقه اليوم خيال=كنه على البيدا فتح للأصيله
صغير سن ومرتوي طيب الافعال=رباني العود و جنيت الحصيله
لا ياعلي أحرص على طيّب الفال=وجنب رجالٍ ما تشيل الثقيله
وأقفل على هرج الملاقيف الاقفال=خله غريبٍ ضاع و أخطى دليله
الناس صارت بالمناظر والازوال=واليا أحتمى الموقف تجر الفشيله
كم ناس عاشت بالمظاهر والأشكال=أكبر فعايلهم تسوق الرذيله
وكم من صغيرٍ يعتبر مجد و ظلال=اليا بغيت العلم لازم تجيله
الشعر مثل النار في لحظة إشعال=والا كما بنٍ تزيّن بهيله
اليا كتبنا نضرب الجال بالجال=تهتـز سلمى و الجبال الطويله
واليا بطشنا بطشنا ماله أمثال=تشهد لنا ماضي السنين الصقيله
بعض الشعر هرجٍ من عقول جهال=وبعض الشعر يشفي القلوب العليله
أحدٍ بشعره يا علي يجمع أموال=وأحدٍ وربي كل أبوها جزيله
أحدٍ يجيب الشعر مُحكم بالأقوال=وأحدٍ هبيل و مادحٍ له هبيله
أحدٍ مريض و كل وقتٍ على حال=وأحدٍ حرام إنك تدور بديله
كتبتها من دون عمدان و أميال=لا طآح شطرٍ قام خيه يشيله
تبقى مثل نقش الصخر مر الاجيال=يقراء بها راع العقل الف ليله
وختامها صلو على خير مرسال=اللي طريق الخير وضح دليله