بسم الله الرحمن الرحيم

البارحه مستريح القلب هالحزه = والليلة القلب عذّبي ماهو لازي
يومي كما ريشه صلف الهوى هزه = على الورق سدرةٍ شركه بقزازي
يزوع لولا ضلوح العوج تحجزه = زوعه سراب زماء مع حزم نقازي
قلبي به الهم والهاجوس يمتزه = مزه حمر دم عرق بخشم بروازي
وعيني قزه عن لذيذ النوم وش مزه = سهر الشقا و الرهق بصبيه نحازي
ودنيت بطل الصحاري طيب الفزه = أقبل يهقوي مع الطلعات فزازي
أدعس على البنص لآخر قوته كزه = ياما يجيب الأنبير رقومه اجوازي
لا فر ويله متين القاع به رزه = سكبر عجاجه و ولع شمعة الغازي
بأرض عفاش خبير القار ما قزه = ما يقطعه ياكود لاندكروز ممتازي
يا دش له رمله وشنابه اهتزه = يفوت بيعه و تصبر وأنت معتازي
الله ينصر وكيل الجيب و يعزه= من طوكيا مورده بأرقام و رمازي
لولا اشهب الجيب يشفي خاطري قزه = لا طق طقة قزاز عند قزازي
على الذي مثل عود الموز ليا غتزه = تاقف كما الضابط اللي يعطي العازي
ليا شفت زوله ثقيف الروح له فزه = فزه عضيض الغلاث بتيه برازي
أبو نهيد غض الصدر مبرزه = يشكي رهيف الثياب نهيده النازي
يشبه زبيديه صبح المطر لزه = أقبل على صيف التفاح ممتازي
عندي قريب وعدك من وراء غزه = ومن دون وصلك مطبات ومقمازي