هنيٍكم يأهل القلوب المريحه=يللي على طرد الهوى ما تحرصون
طعامكم با الليل (رز) وذبيحه=ولامن تعشيتوا بسرعه تنامون
ما ساقكم يم (البني) حلو ريحه=ولا كلمةٍ عذبه ولا غمزة عيون
يا ما نصحت ولا قبلت النصيحه=كنت (بمريضة نفس) غاوي ومفتون
به حكمةٍ ما كنت احسبه صحيحه=(ان العذارى كل ساعه يحبون)
اما عقب ما صار اقوله صريحه=آمنت با الحكمه مثل ما يقولون
طاح الجمل والله ستر في مطيحه=مابه كسور ولكن القلب مغبون
الغبن هيض عبرته والقريحه=ونظم بيوتٍ منها الاجواد يبكون
ما من عزا لهل القلوب الجريحه=لاصرت مخلص والذي حولك يخون
بعض البني عنده طريقه قبيحه=تعرض حبه ترجي الناس يشرون
وليا شريته مهجتك تستبيحه=تآمر عليك وتملكك غصب وتمون
ومن بآكر تخونك وهي مستريحه=وش ضرَها لامنك امسيت محزون