جتني قصيده تستحقّ الاشاده=ابيات للي منبع ابياته الذوق
شاعر خذا لجزل القصيد السياده=له منزلٍ عندي مهو لـ اي مخلوق
ومن معنى كلامه اخذت الافاده=وين انت ياللي بكثر الاشغال مخنوق
ترا الوناسة والطرب والسعاده=فرقا الديار وزحمة الناس بالسوق
مع درب راع المعرفه والركاده=صميدعٍ ما جلعد بشور مطفوق
في خايعٍ قفرٍ يذعذع براده=يا زين مع شمس الضحى مرتع النوق
ما لوم من شفّه وغاية مراده=وضحٍ هواها ساق راع الهوا سوق
يا شافهن يرمي علاج العياده=لو كان دايم بابرة دواه مدقوق
ويدله بهن عن كل هم ونكاده=بارضن كساه النبت من كل زملوق
هذا ومن دافع هوايه وعاده=الطير له عندي مواجيب وحقوق
يعطي على دخل انبساطي زياده=فرخٍ وحش ما قيّض العام بسبوق
ان وفق المولى بفرصة هداده=ورّد على برقا الجناحين من فوق
يا ادّيت للخالق فروض العباده=سق القدم يا صار ما بالقدم عوق