دوّر العـــــلّه قبل لاتـــــــــدور لك علاج =لاتجيب المـــعرقه قبل لاتشري الاصيل
أشعِل لظُلمات وقتك من افكارك سِراج=وابتســــم ويصير كوخ الالم قصرٍ جميل
يــــــوم كثرت في زمنّا عباره "إحتجاج"=إعلم انّا بالحضيض وكبير القـــــوم ذيل
في زمــان الضعف نبلش قراح الا أُجاج=نترك الســـامي ونبعد ونرضى بالقليل
اختلف صُلب المفاهيم في غبّه عجاج=واختلف تصنيفنا بيــــــن عج وبين ليل
رُقــــعه التبرير اصغر من وساع الفجاج=والمـــواقف طيّحت هالقناع من الذليل
زخرفوا لك جُرعه الذل في شذرات تاج=وملّكـــوك عروش ذُلك وفي ظنّك نَبيل
يــوم كانت خيلنا تُكسِب الدّرب ارتجاج=كان جهل الغرب ياخذ من اجدادك سبيل
ويـــــــوم ضيّعنا الديانه غدينا كـ النعاج=كل من جــــانا هنشنا بلا حيله وحيل
ريشـــــنا قرب يصف كثر ماناكل دجاج=انحدارٍ يكسبه جـيل من نكسات جيل
تقنيتهم ضيعــــتنا وســــــووا له رواج=ومصنع الافكـــار صفّى خويطٍ لا حُبيل
لاطمـــوح ولا هـدف لا عدال ولا عواج=دخّــــلونا بعالم الافتـراض بدرب سيل
نكفر ونطلب مــن الله سـريع الانفراج=ومن قطع حبله مع الله ينُصًر مستحيل
صاحبي والسّيف مايضعف من الاعوجاج=دام هالمــــعدن اصيل ويهاوز به اصيل
لا اعتصمتوا ماغزى الحوثي لقريه دماج=ولا نعَــت صنعاء لدرعاء وبـونمر لبوليل
ولا غـــدى بلادي لسياره الفتنه كراج=ولاغــــدينا لعبهٍ بين طمّـــــاع وهبيل
مهرتي والليل اقوى من انوار السراج=لملــميني حدّن البرد والعاشق ذليل
سَعـــدي وغيي وكيف وسر الابتهاج=مرجحيني بين جفنك وهالرمش الضليل
غيثي الملهوف من صوتك ليا الفكر ضاج=لين تُودي زبده الفِكر من هاك الصّميل
مشـــكلتنا دايــــــم ندوّر انواع العلاج=قبل لانــدري وش العله ومنهو العليل